Ndalohet iftari në xhamitë e Kuvajtit

Pavarësisht se Arabia Saudite ka njoftuar zyrtarisht kthimin e vakteve të iftarit në xhamitë përfshirë Mesjid Al Haram dhe Masjid An Nabawi, shteti fqinj Kuvajti ka bërë të kundërtën.
Gazetat lokale bëjnë të ditur se Ministria e Kuvajtit për Awkaf (vakëfe) dhe Çështjet Islame ka nxjerrë një qarkore që ndalon organizimin e vakteve të iftarit brenda xhamive gjatë Ramazanit. Ky hap është ndërmarrë nga autoritetet e Kuvajtit për të parandaluar përhapjen e COVID-19 i cili aktualisht ka filluar të bjerë.
Megjithatë, sipas Al Jarida, ende lejohet shpërndarja e ushqimeve të gatuara paraprakisht jashtë xhamive të cilat njerëzit mund t’i hanë në perëndim të diellit në fund të agjërimit ditor.
Përveç kësaj, dallimi në masat paraprake gjatë Ramazanit midis Kuvajtit dhe Arabisë Saudite fqinje mund të shihet edhe nga leja për vendosjen e tendave brenda xhamive gjatë muajit të shenjtë të Ramazanit. Ku sauditët lejojnë ngritjen e tendave për organizatat që duan të organizojnë iftare, por me kusht që fillimisht të marrin leje nga Mbrojtja Civile. Nga ana tjetër, autoritetet e Kuvajtit thuhet se kanë ndaluar ngritjen e tendave brenda xhamive për arsye shëndetësore.
Duke cituar burime të Awkaf-it, u tha se Ministria nuk do të jetë neglizhente në marrjen e masave ndaj shkeljeve të qarkores së lëshuar, aq më tepër që pasojat e koronavirusit ende po prekin disa sektorë në vend.
Të dhënat tregojnë se COVID-19 dhe variantet e tij ende ekzistojnë pavarësisht një rënie të konsiderueshme të infeksioneve ditore dhe kthimit në aktivitetet para pandemisë.
Në fillim të këtij muaji, autoritetet e Kuvajtit në fakt kishin njoftuar se të gjitha xhamitë në vend do të kthehen në normalitet dhe do të fillojnë të heqin kufizimet antivirus, duke përfshirë urdhrat e distancimit fizik të besimtarëve në xhami.